Κάποτε είνας ερώτεσεν έναν Πόντιον:
– Γιά πέει με. Ατόσον έμορφος χορός η σέρρα, γιατί ’κί χορεύ’ν ατον ούλ’ οι Πόντιοι;
Και ο Πόντιος ξάι ’κ’ εσάσεψεν και λέει:
– Όλαν, από πα έν’ να ρωτάς ατο; Πέντε νομάτ’ χορεύ’νε σέρραν και σείεται όλον ο τόπον ντο πατούν. Ατώρα λογαρίασον ντο θα εΐνουτον άμα εκατομμύρια Πόντιοι εχόρευαν σέρρα ούλ’ εντάμαν. Σεισμός σ’ όλον την Ελλάδαν. Θ’ εζαντύναν οι σεισμογράφοι. Οσπίτα, γεφύρα ’κί θ’ απομέναν απάν’ σην γην. Το κράτος έπρεπεν ν’ αλλάζ’ τον ΓΟΚ [Γενικό Οικοδομικό Κανονισμό], να χτίζ’νε κι άλλο γερά οσπίτα και και γεφύρα. Αρ’ για τ’ ατό ’κί χορεύνε την σέρραν ούλ’ οι Πόντιοι. Γιατί αγαπούν τον τόπον ατουν, τον τόπον όθεν ζουν. Γιατί αγαπούν την Ελλάδαν.
Οι Πόντιοι χτίζ’νε, ’κί γκρεμίζ’νε. Εγροίξες;
Γιώργος Κωνσταντινίδης,
Καλαμαριά
- Αναδημοσίευση από την εφ. Ποντιακή Γνώμη, έτος 8ο, φ. 86 (Μάιος 2016).
