Ο σύλλογον Διποτάμου Καβάλας «Ο Άγιον Γεώργιον» ετοπλάεψε σ’ ίναν παρχάρ (πολλά σύγχρονο έτονε) τα παιδία τη συλλόγου. Χτήνα(ε) ‘κ’ είχαμε, εφέκαμ’ ατά σην πατρίδαν, άμαν το συνήθειον ‘κί κόφκεται! Έι κιτί πατρίδας παρχάρε! Ραχ(σ)ία και νερά κρύα!
Ούλ’ εντάμαν οι νοματαίοι, τρανοί, γεροντάδες και γραιάδες, νέοι και νέησσες, παιδία, εγγόν(ε)α, μωρά, χάταλα, ευρέθαμε οσήμερον 28 τη Αλωναρί (Αυγούστου) ‘ς σο Richmond Hill (Ρίτσμοντ ραχ[σ]ιόπο μ’ θα λέμ’ ατο) με ποντιακήν καταγωγήν ασά χωρία τη Ματσούκας.
Για να μη νεσπάλουμ’, ας γράφτομ’ ατά: Καπίκιοϊν, Κοσμά, Δανείαχα, Λιβερά, Γιαννάντων, Γιαννακάντων, Ποντίλα, Κούτουλα, Σαχνόη, Κουνάκα, Μαζερά, Χορτοκόπι, Λαραχανή. Εποίκαμε τρανόν θερινόν αντάμωμαν αδά ‘ς σο Τορόντο τη Καναδά.
Τ’ εμετέρ’, έρθαν ‘ς σο Τορόντο μετανάστες, ασό χωρίον Διπόταμος Τσαϊλίκ (Καβάλας). Καλατσεύουμε σκηρά τα ποντιακά. Χορεύουμε και τραγωδούμε μαναχά ποντιακά. ‘Κί πειράζ ντο ευρείουμες απές σοι Εγγλέ(ζ)οις!
Πολλά εχάραμε όντες εγροίκαναμε τοι παλιοίς να αναστορούνε μεσέλια τη πατρίδας. Όντες αρχίνεσεν ο κόσμον να τοπλαεύκεται, αναχάπαρτα, τεμέτερον ο Γιωρίκας ο Καλομοίρης, εποίκε μας ίναν έκπληξην. Έγκε την μικροφωνικήν ατ’ και εσέγκε απές σ’ ίναν τρυπίν τ’ ευλοημένον το i-phone ατ’ και έκουαμε το ράδιο Λελεύωσε ζωντανά ασήν Ελλάδα! Ούλ εχάραμε και πήραμε άψιμον!
Το φαΐν έτον πολλά έμνοστον και χορταστικόν! Εσκουντούλτσεν το παρχάρ’! Το χαρπούζ’ πολλά γλυκόν!
Ο Μουχτάρτς ο Παύλον τη Χατζησάββα ο γιον, έτον ακάματος! Και τ’ άλλ’ τα παιδία (τη μουχταρλικί το συμβούλιον) πολλά ενεγκάσταν με τα ετοιμασίας.
Παρευρέθαν οι Θεοφυλακτάντ’ (τρανόν γένος), οι Πιπεροπουλάντ’ , οι Σιταράντ’, οι Τσιλφιδάντ’, οι Φωτιαδαίοι, οι Χατζησαββάντ’ οι Σαββιδάντ’, οι Τσακιράντ’, οι Ανδρεαδάντ’, οι Ζωσιμαδάντ’, o Ηλίαν ο Νικολέτσον (ατός έν Πόντιος ασή μάναν’ατ), οι Αλεξάντ’, οι Καλομοιράντ (ατοίν έν ασή Σάντας τα χωρία και απές ασήν Τραπεζούνταν). Σχωρέστε μας αν ενέσπαλαμ’ καμίαν οικογένειαν.
Έι κιτι χρόνια…
Παναγιώτα Αμμανατίδου
Γενική Γραμματέας της Αδελφότητας Ποντίων Τορόντο «Παναγία Σουμελά»
- Όλες οι φωτογραφίες παραχωρήθηκαν στο pontos-news.gr από την Παναγιώτα Αμμανατίδου για τις ανάγκες της δημοσίευσης.
